"رضا منطاوى" بقلم سعيد الشافعي

رضــا مــنطاوي

لو حبيت اتكلم عنك
يبقى كلامي عايزله سنين
سابق عصرك ... سابق سنك
بتفكرني بسعد آمين
اما صحيح الموت بينقى
مبيخترش غير الحلوين
***
آي فقير محتاج خدماتك
كنت بسرعه بتجري معاه
يالي وهبت الدايره حياتك
حب الناس من حب اللاه
حب الناس كان حب لذاتك
حب كبير في ميزان حسناتك
رضا منطاوي
ذكراك باقيه لبعد مماتك
رضا منطاوي الموت اختارك
علشان احنا نشرب نارك
علشان نكره الانتخابات
نكره شغل تلات ورقات
وانت مريض جوه المستشفى
شوفت وجوه صفره بتتشفى
بعتوا رسايل ع المحمول
مش عيان ده فعلا مات
لسه الروح جواك موجوده
واتصنفت مع الاموات
***
ساعة الفُرقة
شوفت عجايز تحت الشمس بتبكي بحرقه
اعلام سوده واعلام زرقا
مين كان جه خبط على بابك
وأنت كسفته وقولتله لأه
شوفت شباب من تحت الارض بيظهر فجأه
يمشي وشايلك م المطراوي لكفر فاروق
شوفت حبايب رضا منطاوي
قاعدين حوالين المستشفى .. وبيدعوله
يكفيه شر ولاد السوء
شفت مظاهرة حب حقيقي
شفت ألوف الناس في طريقي
منظر متتكرش وعمره ما حيتكرر
شفت مظاهرة حب تحير
كله بيبكي
كله اتحول طفل صُغيَر
مين ف الدنيا كان يتصور
ينجح رضا ف حياته وينجح بعد مماته
مش علشان اخلاصه لناسه
أو خدماته
انا بتصور.. حب حبايبه
حب لشخصه .. حب لذاته
حب لفعل الخير في حياته
***
زي ما فيه مولد المطراوي
لازم نعمل يوم الجمعه
يوم 23 في العربي جماد التاني
تعمل مولد رضا منطاوي
زي ما فيه مولد المطراوي
نعمل مولد رضا منطاوي